2025 年 4 月底，香港觀鳥會到訪位於韓國仁川嘅「東亞—澳大利西亞遷飛區伙伴關係成員 (EAAFP)」秘書處，以及「聯合國亞洲及太平洋經濟社會委員會 (UNESCAP)」。行程除咗參與黑臉琵鷺會議外，亦與 WWF 香港組隊參加「高敞觀鳥大賽」，交流濕地保育工作經驗。
香港觀鳥會總監余日東先生參與黑臉琵鷺會議
會議上，鳥會總監余日東先生與 EAAFP 及 UNESCAP，匯報今年 2 月嘅「國際黑臉琵鷺會議」內容及結果，並討論未來黑臉琵鷺保育工作嘅方向及研究重點。香港觀鳥會作為 EAAFP 成員，未來將繼續推動黑臉琵鷺區域保育，以及遷飛區內嘅水鳥及海鳥保育工作。
除咗黑臉琵鷺會議，我哋亦與 WWF 組成「香港隊」出戰第四屆「高敞觀鳥大賽」，與其他 34 支隊伍競賽，最終榮獲「稀有鳥種獎」及「最佳海外隊伍獎」。更難得嘅係，我哋藉住比賽與來自當地及世界各地嘅觀鳥愛好者同保育專家交流，加深了解各地候鳥保育嘅挑戰。
香港觀鳥會與 WWF 組隊出戰第四屆「高敞觀鳥大賽」
比賽地點嘅高敞郡潮間帶濕地，不僅屬拉姆薩爾濕地，更係被列為「聯合國教科文組織世界遺產」嘅地點。由於高敞位於朝鮮半島西南部、毗鄰黃海，並擁有大面積泥灘，因此係「東亞—澳大利西亞遷飛區」嘅遷徙水鳥重要中途站。
