勺嘴鷸屬全球極度瀕危物種，體型只有手掌咁細，擁有一張獨特嘅匙羹嘴，主要棲息於沿海泥灘。佢哋會不時到訪香港后海灣覓食，但由於棲息地喪失或退化及捕獵等問題，香港數量近廿年嚟明顯減少，估計現時全球剩返唔夠500隻。

自2011年起，鳥會持續透過 #區域合作、#鳥類調查、#公眾教育工作 保育勺嘴鷸，除咗協助打擊華南地區非法捕獵問題，亦定期進行調查工作，同埋提升公眾保育意識。

區域合作打擊非法捕獵
針對華南地區嘅非法狩獵問題，2014年我哋聯同廣東省湛江市愛鳥協會展開調查工作，並與當地政府建立通報合作機制，更招募義工合力監測、舉報及拆除非法霧網。經過各方努力，現時非法捕獵嘅威脅已大大減少。

鳥類調查
為咗進一步了解勺嘴鷸喺華南地區渡冬情況，我哋聯同中國各地組織展開「華南地區勺嘴鷸冬季調查」，以便制定更有效保育措施；2019年，我哋亦出版「中國沿海水鳥同步調查報告」，集合咗由2005年起中國沿海地區嘅水鳥數據，希望監察勺嘴鷸等沿海水鳥嘅數量趨勢。

公眾教育
2018年，我哋聯同日本野鳥會出版《認識勺嘴鷸教材套》，供教師及環境教育導師設計課程，內容涵蓋濕地同勺嘴鷸嘅保育知識，希望將保育種子傳承畀年輕人。

鳥會將會繼續保育勺嘴鷸，如果你都唔想勺嘴鷸喺地球上消失，請一齊為瀕危雀鳥籌款：https://bit.ly/3LSigZD