全球近危卷羽鵜鶘係一種巨型水鳥，體長高達1.7米，足足一個成年人咁高！佢哋曾經係香港后海灣濕地常客，但由於數量下降，自2010年後就絕跡香港，估計現時東亞族群僅剩約150隻，更呈下降趨勢。

為咗保育卷羽鵜鶘，鳥會喺2019年親赴蒙古參與國際保育會議，聯同世界各地嘅鳥類保育團體成立咗「卷羽鵜鶘工作小組」，並制定國際保育方案，包括 #調查未知繁殖地及過境地點、#加強保護現有渡冬地、#鳥類環誌工作。

調查未知繁殖地及過境地點
由於蒙古係卷羽鵜鶘嘅最後一個東亞繁殖地，如果發現到其他繁殖地，就可以透過設立保護區改善繁殖環境及棲息地，從而增加族群數量。 

加強保護現有渡冬地
卷羽鵜鶘主要喺東南沿海地區越冬，當中有唔少濕地面臨發展壓力同干擾，例如房地產開發、水產養殖業、填海、魚網密佈同遊艇等發展項目，因此各個地區需要加強監管，以有效保護現有渡冬地。

鳥類環誌
2020年，「卷羽鵜鶘保育工作小組」喺蒙古為13隻卷羽鵜鶘幼鳥戴上環誌，其中兩隻更裝上GPS全球定位追蹤裝置，以紀錄佢哋嘅遷徙路線及特性。GPS數據發現，卷羽鵜鶘嘅遷徙路線非常相似，有助研究人員了解佢哋數量下降嘅原因。

鳥會將會繼續跟進卷羽鵜鶘保育工作，請大家同我哋一齊守護呢隻鳥界巨人，立即捐款支持鳥會新界區賣旗日：https://bit.ly/3LSigZD