本地稀少董雞相隔半世紀於中環再度鳥撞玻璃

【本地稀少董雞相隔半世紀於中環再度鳥撞玻璃　揭夜間遷徙候鳥鳥撞風險】

上年 9 月底，一隻香港稀少嘅保育類物種——董雞，懷疑喺夜晚撞上中環文華東方酒店玻璃窗，導致骨折受傷。幸得巿民及時發現，並送往嘉道理農場暨植物園拯救中心，受傷董雞經復康治療後喺 10 月中米埔野放。

令人痛心嘅係，原來董雞鳥撞玻璃並非首次。翻查鳥類記錄，1970 年 10 月同樣係夜晚時分，就錄到一宗懷疑董雞鳥撞玻璃，而事發地點嘅大廈，距離今次鳥撞嘅文華東方酒店，只相隔 400 米。半世紀後，董雞再次喺中環鬧市，成為鳥撞玻璃嘅受害者，又帶咗畀我哋咩啟示？

董雞係一種夜間遷徙嘅過境鳥種，每年 9 月底至 10 月為在港過境高峰期。佢哋偏好長有水生植物嘅沼澤、水田等開闊濕地生境，而中環高度城市化嘅環境並唔係合適棲息地。因此，我哋估計呢兩隻個體喺遷徙途中，受到中環及維港一帶嘅人造光源所干擾，而誤闖高鳥撞玻璃風險嘅城市環境，繼而發生鳥撞玻璃。

不幸事件重演，正正揭示緊夜間人造光害對夜間遷徙鳥類嘅潛在影響。根據《香港鳥撞玻璃報告2022-2023》，309 隻鳥撞死傷記錄入面，有 46 隻係夜間遷徙候鳥，香港嘅光害問題對鳥撞風險嘅影響，不容忽視，而且值得更多研究。

我哋可以做咩去改善？首先針對現有建築物，建議政府、業界同市民，可以管制燈光設計同時間嘅手段，防止燈光喺夜間外泄，以減低光害對夜間遷徙鳥同鳥撞風險嘅影響；對於新建築物，則應該跟隨全球步伐，通過立法嚴格要求新建築須具備防鳥撞設計。

重溫《香港鳥撞玻璃報告2022-2023》：https://bit.ly/3N6sXIp
領取「鳥撞玻璃公民監測套裝」報告社區個案：https://bit.ly/3TmQkkw
選購「鳥撞主題限量TEE」支持「監測套裝」出版印刷推廣：https://bit.ly/4dgRC85